雨過天晴~

March 31,2006 哈~~阿文冇嬲我了~~真好~我都知阿文唔會嬲我甘耐嫁啦~ 我對住自己的任性, 真的很後悔呢... 我好相信呢~到阿文份工做得穩定左之後呢~ 我地擺完酒之後呢~就會鬆動好多~到時想點影都得啦~ 昨晚阿文成8:40打比我(我已在家, 洗過澡, 等睇我近期追緊的標局) 阿文竟然冇帶公司匙，沒有辦法鎖門，而且全公司的人都走了..只剩下他一個。 我便馬上提意要拎去荃灣比佢！呢個係唯一的方法。 我馬上換衫就衝出去~ 9:05就到達荃灣，阿文就落黎MTR接我去佢公司。 這段路途中，阿文並沒有拖著我的手呢... 到了他公司的附近，有一家茶餐廳。 他就冷冷的說了一句: 不如你在這裡等吧, 這裡有電視看。" 我當然不依, 因為我終於等到一個機會可以去看看他辦公室的環境，我又怎會錯過呢~哈~~ 阿文老是說辦公室的地方很細, 其實都唔算啦..都OK呀. 都唔算太細呀. 阿文鎖好門, 我地就離開啦！ 出到大堂，阿文就有拖住我隻手啦~~~~~ 甘即係冇事啦~~~ 我們再一次經過那家茶餐廳，他又問我一次, "要唔要在這裡睇電視?" 我就忍唔住笑了出來, 睇黎佢都知道我真係好想睇標局！ 但我就答左佢一句 "去食飯呀?唔睇電視啦!" 跟住我地就好似平時甘, 講下今天有咩趣事啦。 今早, 阿文出門口返工時, 都有同我講BYE BYE~哈~~~

我有錯嗎?

March 30,2006 今早的精神勁差呢...昨晚跟阿文鬧交，其實都唔知算唔算係鬧交..因為好似只有我在發脾氣...諗返起..我地為左咩鬧交呢...原來都只係為左影多次婚紗相呢個問題： 由於我極之想去古風尚度影多次婚紗相，我好想在4月份影, 因為又未算太熱, 而且要預時間揀相, 拎相，時間應該差不多。 我希望在11月份擺酒前, 完成第二次影相。因為我覺得，影婚紗相, 一定要結婚前影的，結婚後就唔會再有心情去影。 但阿文就認為，我每次一決定左要做一件事，就一定要好短時間內完成！他覺得這是我的老毛病！ 我一想起要做一件事, 就會第一時間走去完成，免得心掛掛。 他認為, 我地已經在新天地影過一次, 又已經有一幅油畫供擺酒時用，點解唔等擺完酒後，一切都比較充裕時才去影？ 我堅持要在擺酒前影多一次。 他就說起碼都等到6月至7月，駛唔駛三月影完, 四月又要去影呀！ 我就完全唔明白點解要拖到6月, 到時候天氣熱到死, 同埋快D完成左, 唔係會好D咩？ 跟住我就發晦氣，既然是這樣，就決定唔去影LOR！唔駛煩~~ 之後我地就不歡而散會哪，到今早他都沒有跟我說一句說話！ 我 有 錯 嗎?

古風尚

March 28,2006 我今天看了很多在生活易婚網留言關於呢家我好想去影的深圳婚紗攝影。 看來相片影出來的質素是不錯的, 但由於是大陸的公司, 感覺就好似一向在大陸買野一樣, 一定要講價！他的優惠非常海鮮的~你多D人去, 甘就多D優惠。 可是, 只有我一對想去影,,阿文的其他朋友, 個個都去台灣影。我又唔想去台灣影WOR.....真令人煩惱哪.... 有誰可以幫幫我啦~

揀相之後

March 27,2006 星期六揀相就勁啦~夾埋我同阿文, 我地一隊共有6個人的TEAM(PIKKI, KELLY, KARMAN, 顧, YO & 文), 直踩去九龍塘的新天地~ 我都預左D相好易揀嫁啦, 因為好多都睇得出我好生硬, 個樣好怪, 好好笑~所以好快就揀走好多相。 但都好奇怪, 揀左甘多走, 但我地都揀多左16張。甘個位小姐就幫我計好哂, 如果多左呢16張要加埋入相簿要幾錢哪。 嘩~最平最CHEAP都要加多4500元呀~我呢個PLAN的價錢都係3999元, 影完竟然要加DOUBLE~~ 而最富貴的PLAN(即係加入去我地原本都已經有20版的大相簿裡面)就竟然要17000呀~ 至於每加一頁入我本大相簿呢, 就要加468元~~~真係想像唔到甘貴呀~ 精打細算的YO當然唔會比佢地割一頸血啦~ 經過男方及女方分別都退庭商議。 我地一致通過只加入兩張黑白相入去我地本大相簿: 468元 X 2 再加封面的一張相: 288元 甘總共我地只須加多1224元 個個都讚我地勁呢~ 要到7月9日先有得拎相呢, 要到個時先可比大家睇哪~ 但係呢...其實呢輯相呢, 我都唔係真係甘鐘意(如果唔係, 都唔會剔走到甘多相啦) 所以, 我都有D心思思想去深圳影多一次, 其實之前已經好想去呢間叫古尚風的影~好鐘意佢地D風格~而且在生活易婚網上, 呢間野亦備受好評... http://www.gfssy.com/ 但如果要影多次, 甘就要駛多4000元嫁啦...好似又有D唔捨得甘. 睇呢個價錢好似同新天地差唔多, 但人地可以揀55張相, 新天地只有20張咋, 好彩我有COUPON先多12張咋....... 阿文又係個句, "最緊要你鐘意!" 個波又交返比我.........

隨著他的喜而喜, 隨著他的悲而悲。

March 25,2006 今天終於有得睇婚紗相啦~ 等左甘耐, 終於有得睇相啦~好緊張呢~~~希望我地唔會大出血啦~加油呀~~~~ 前幾日, 我同AGNES吃飯，AGNES 是我讀POLY時的同學，我地都識左好幾年了~我地傾左好多野！仲有一D連我自己都唔知道的事~ AGNES話當知道我們宣佈要結婚，佢地個個都幾震驚嫁, 因為冇諗過我會甘快結婚, 畢竟我地仲甘後生~哈~ 她們初時會諗我係咪一時衝動而結婚呢?因為在她們而言, 絕對是不過30都不會考慮結但婚的事業女性~~ 但好快, 她們就打反了這個想法了, 因為, 她們討論過, 一致裁定YO絕對係一個好有PLANING 做事的人~絕對唔會因為一時衝動而結婚的~ AGNES所持的理據是: 阿YO在讀書時期已識得走去做"零存整富". 聽到這裡, 我都忍唔住笑了出來~~哈~~係呀~~我一向都好鐘意儲蓄嫁~ 唔知我其他朋友知道我要結婚的消息係咪都係甘震驚的呢? 朋友~其實你們不必驚訝, 我們是很自然的想組織一個家庭, 所以才決定結婚的, 我們是經過深思熟慮的~ 我和阿文相識於2001年1月15日, 距今已經有5年零69日了。這5年間, 我們經歷過很多事, 而令我們可以堅持在一起的, 就是我們一起攜手敖過的苦事： - 阿文失業的日子 在我跟阿文一起不久的時候, 他曾經因為某些原因，不想再跟他那時候的老闆一齊做野。 我幫他一起努力找新工作, 每早我返到公司第一時間, 就係上勞工處的網頁, 看看有什麼適合他的工作可讓他去試，無奈那時候的經濟尚未轉好，要搵工真的不容易, 再加上佢本身做的電話線機安裝的行業, 行頭很窄, 所以搵了很久, 都沒有消息。 阿文的士氣及信心隨著時間慢慢磨滅。這段時間維持了足足半年, 對我來說,這段時間好比三年零八個月.... - 親眼目睹阿文的3個朋友在車禍中喪生 我們在車禍現場，親眼睇住3個剛剛還在一起很開心BBQ朋友逐一傷重不治，自己什麼都做不到, 不是教徒的我, 竟然向神祈禱。 祂最後給予我們一個折扣, 車上5個人, 有兩人得以生還...... - 芬姑姐的過世 她是阿文的六姑姐，是個很成功的事業女性, 她在迪生集團做到很高的職位。 同時, 她亦是一個好媽媽, 是一位事業與家庭均兼顧得很好的人。是一位令人很敬重的女性。 可惜的是, 上天只讓她的人生走到39歲。 2003年, 是不吉利的年, 那年, 在香港因為沙士而死的人有好幾百人。 而芬姑姐係得到癌症而過身的...她一直隱瞞住自己的病情, 怕我們為她擔心, 直到很後期, 她才讓我們知道她的病情。 之後, 半年之內, 她就走了。 我好記得, 她走的一天, 是母親節後的一天, 因為那時我正與我的爸媽一同為母親節出街食飯的。 突然就收到阿文打電話來, 哭著對我說"芬姑姐走了......." 那種不捨的感覺, 是我甘大個女第一次體會到.....芬姑姐已經永遠活在我們的心中！ - YO有乳癌 正當芬姑姐因癌症被病魔折騰, 我竟然發現兩邊乳房都有硬塊。而我照了X-光出來的結果, 是不樂觀的, 因為我體內硬塊的型狀並不像良性般圓順的, 所以極大可能是惡性腫 瘤, 即是CANCER。 本來我是在聖母醫院做抽組織檢驗的, 但我的私家醫生說我有9成半都係惡性的, 所以我未等到抽針的報告, 他就寫信幫我轉去Q.E, 那裡的設備比較好, 為日後做電療, 化療亦會好一點。那時候我萬念俱灰。 終於等到抽針結果出來的日子了, 我就像一個等待死刑判決的囚犯。但報告卻顯示, 在我體內的是良性瘤!!!!我不敢相信的再問醫生一次, 他都說了同一個答案。當時陪我一起喜極而泣的就是PIKKI。 雖然第一個抽針報告, 證實了是良性瘤, 但當我轉到Q.E的時候, Q.E的醫生卻對我說, 因為我X-光影出來個影真的很似是CANCER, 建議我再抽一次針, 而且, 今次的抽針, 那支針是跟一隻筷子甘上下粗的~比第一次抽針所用的針更粗, 能抽出來的組織會更多...可是, 我好不容易才得到一個好消息, 轉眼間, 醫院又要我再面對一次......抽針真的很痛, 是我一生都不會忘記的痛。 幸好的是, 第二之抽針的結果都是良性。 這件事我只告訴了幾個朋友, 我爸媽當然至今都不知道。朋友們的支持, 令我很安慰. 特別是PIKKI。 而且在我身邊一同被煎熬的, 仲有阿文。在這段期間, 我老是向壞的方面想, 心情極差, 成日向他發脾氣, 但後來我發現, 我痛, 他也會為我而痛, 我哭, 他也會為我而哭。 其實, 我們所經歷的, 不止那麼少, 但這幾件事, 我的印象是最深刻的！ 有些人不願意去記住一些曾經發生的苦事, 但我則相反, 我是不會忘記的, 因為: 有了這些苦事的回憶, 才讓我學懂去珍惜身邊的人。 有了這些苦事的回憶, 我才學懂了知足常樂。 有了這些苦事的回憶, 令我知道, 不可以把所有的時間都放在工作上。 有了這些苦事的回憶, 令我覺得現在的我真的好幸福哦！ 我曾經想過, 萬一我有一天要離開這個世界, 我都希望認識我的人會把我在放在心中, 不會忘記曾有一個YO YO LAW存在過。 跟阿文在一起, 感覺很舒服, 沒有壓力。 隨著他的喜而喜, 隨著他的悲而悲。 跟他在一起, 有沒有鑽石介指已經變得次要~ 最重要的是，我們一起的每一天都活得很開心~~ 雖然我們經過這麼多不開心的事, 到現在都仍然在一起, 而且, 我喜歡阿文的, 一點也沒有退減, 相反, 更是與日俱增。而我亦知道, 阿文對我的珍惜, 是放在第一位的。(除了踢波個時) 既然已經認定了, 何不早點結婚~踏出我們人生的另一個階段呢~ 一週年：紙婚 二週年：棉婚 三週年：皮婚 四週年：絹婚 五週年：木婚 六週年：鐵婚 七週年：羊毛婚 八週年：青銅婚 九週年：陶器婚 十週年：錫婚 十五週年：水晶婚 二十週年：磁器婚 二五週年：銀婚 三十週年：珍珠婚 三五週年：翡翠婚 四十週年：紅寶石婚 四五週年：藍寶石婚 五十週年：金婚 五五週年：綠寶石婚 六十週年：金剛鑽婚 七十週年：白金婚 那麼, 我和阿文距離白金婚紀念越來越近嫁啦~ 這是我第一次真正戀愛, 亦是我的最後一次. 所以, 各位親愛的朋友們~得到你們的祝福, 我倆會十分開心的啊~

換智能身分證的待遇~nice~

March 24,2006 昨晚我和阿文終於都去左尖沙咀中心辦理換領智能身分證的手續啦~佢地真係甘多個政府部門裡面~最nice的一個~ (因為之前試過QE的不禮貌對待)所以一直對政府部份都深存芥蒂。 但入境處的服務真的很好呢~期待兩個星期後拎到一張很漂亮的智能身分證啦~~~ 阿文就差D啦, 頭又唔立, 鬚又唔剃....差勁, 影相時又唔微笑, 希望出來的不像通緝的照片哪.... 雖然我之前係約左晚上8:45分去的, 但昨天都冇物野做, 所以我6:15就走得啦, 我地決定早D去, 早D辦完, 趕回家看標局~趕得及呢~~~哈~~~~ 原來就算係唔係預約了時段去做, 都係好快就攪掂嫁~我地約15分鐘就完成整個程序啦~~

智能身份證

March 23,2006 我和阿文預約了今晚去拎智能身分證，本來約左上個星期六的，但因我地兩個都掛住打機, 所以去唔到，唯有再約今晚。 幸好我們都是同一個階段換證的，所以可以一齊去。 而聽人家說了換證的經驗呢-- 唔好著冇領衫, 會影到張相好似冇左條頸甘。最好著SHIRT，同埋唔好著黑色衫，影出來的效果唔靚嫁。 希望快點攪掂可以返去睇標局啦~

媽媽 i love you~~

March 14,2006 得到小win執媽的提醒, 作為媽媽, 她是無言的對子女付出，關心, 但, 往往子女長大之後都不會記在心裡。 由於我已經搬出去住, 見到媽媽的機會就越來越小。每天辛勞工作, 下班就想快點回家休息, 連出街的心情都沒有, 何況回娘家吃飯呢？到了星期六, 星期日, 往往就掛住去玩, 而令到連星期日同爸媽飲餐茶的時間都沒有。我真的覺得很羞愧呢..... 所以我的起心肝, 昨晚就回了媽媽度吃飯, 雖然就夜左d, 因為昨晚都要成8點先收工, 返到去就差唔多9點, 但都好開心呀, 見到爸媽沒有因忽冷忽熱的天氣弄病, 我仲跟他們對換了角色, 係我不斷叮囑他們要多穿衣服, 免得著涼呢~~ 而且, 我希望做的的是, 每個星期六或日都有一天是回媽咪嫁飲茶或吃晚飯。 希望我真的做得到吧！

影婚紗相及做婚前檢查

March 12,2006 這幾天, 我們經歷了兩件廿幾歲都係第一次做的事： 1. 影婚紗相--10/03/06 只可以用兩個字來影容 "辛苦"，唔單止是我們辛苦, 攝影師都很辛苦, 作為女孩子的我就是最辛苦的一個。因為我要穿著很重的婚紗，臉上貼著很厚的粉, 腳則穿上走路很不容易的高跟鞋。我們上午9:45到達, 便馬上開始換衫, 化妝...男士則在外面等. 化了一個多小時, 就馬上開始拍攝, 攝影師風格有點像傑傑, 唔知係咪做類似呢行D STYLE都係甘既呢. 每一個景點影2-3張, 但我發現原來的完全沒有天份做MODEL, 因為我完全唔識得控制自己的身體去擺POST, 攪到好多笑話出來. 攝影師為了引我地笑, 都可謂絞盡腦汁, 但他說到 "你想像下, 竟然有人比5000元人情WOR~~!" 我真的笑到停唔到~~~哈~~~5000元人情WOR~~~~ 我和阿文每人共有兩套衫, 影到下午的4點才完成, 我們是沒有吃到中午飯的。唉~~真的很辛苦, 很累...... 唯一令我安慰的是, 今次KELLY幫我搵人整的花球好靚呢~~~好鐘意！雖然未有甘快可以睇到D靚相, 但而家就睇住我個靚靚花球先啦~ 2. 婚前檢查--11/03/06 昨天我們去了家計會做婚前檢查的第一部份, 抽血, 阿文不斷嚇我話會抽好多好多血的. 攪到我勁緊張, 於是一入去就同姑娘講 YO--姑娘, 我怕血~~ 姑娘--你怕血到什麼程度呢?有冇試過抽完血會暈? YO--甘我又冇甘嚴重, 但我而家好緊張, 十分緊張~!!! 姑娘--啊, 甘唔駛緊張, 先坐得舒服, 然後瞼向另一面, 只會有小小唔舒服, 唔會痛的。 跟住, 姑娘就不斷問我幾時擺酒呀, 渡左蜜月未呀,,,好多問題想分散我的注意力~~哈~但係冇用既~因為我都係好緊張, 仲覺得幾痛下TIM, 佢D問題, 我直頭係有幾條痛到講唔到野答唔到佢~ 抽血係會痛的. 好不容易才捱過左~~你看我有多偉大~~~~

KELLY好利害呢~

March 08,2006 這兩天一直煩緊係邊度買花球去影相, 最平的都要300元, 好似有點貴. 註冊時一個花球$300, 影相一個花球又$300, 到擺酒時又要一個花球$300, 甘剩係駛在花球的費用都成$900, 實在不值。 而最不幸的是, 原本KELLY是學過整花球的, 但剛好在10號, 她就會跟PIKKI, KARMAN佢地去左峇里LU. 所以幫唔到我整。但很利害的KELLY卻幫我搵到一度只須$200的花球。足足幫我慳到$100呢~~~ -------------------------------------------------------------------------------- 講返今日, 上午的心情極之煩躁, 事事不順甘. 但食完午餐之後, 我的心情已經完全平伏了. 因為老闆同客出左去食飯~~呢D係咪就係E.Q呢?如果係的話, 甘我的E.Q. 應該有進步啦！ C TING問我星期日去唔去大浪灣BBQ, 係傑傑攪的, 唔知點解, 好似唔係好想去甘. 平時我都幾鐘意BBQ呢項活動的, 但當我聽到話要去一處我唔知係邊的地方時, 我就真係有點卻步. 我地唔同傑傑, 佢有綿羊仔, 去邊都得. 我一諗到應該要轉好幾程車先到達, 我就覺得煩啦~不如等阿文考左車牌, 而我地又買左車先去D甘山卡啦的地方麻

好擔心呢....

March 08,2006 今日放工都已經很累了, 其實都唔想煮飯...但阿文竟然因為唔想幫手預備開飯及收碗, 所以叫我唔好煮. 我覺得佢呢個諗法都真係好奇怪. 佢返工, 我都係返工, 我返到去煮埋飯, 佢只係負責開桌, 拎碗, 收桌, 收碗咋, 都可以懶到甘...佢的解釋---好悶, 在公司好悶, 返到來只係想攤下, 唔想陏。 聽到佢呢番說話我真的有點失望, 好不容易, 他才有一份這麼穩定的工作。而且, 只要他比心機, 這份工將會帶給他很好的前途, 可惜的是....他就只有覺得他的工作好悶, 好悶. 其實, 這只不過是一份工作而已, 是一個形式, 讓你得到酬勞。你有興趣投入的話, 當然最好, 若然是沒有興趣的話, 就要看現時的情況, 看看你有沒有選擇權, 去選擇一份自己喜歡的工作。 說真的, 我對自己的工作也覺得煩厭, 但我知道, 冇野做, 就冇錢, 所以我一定要做，而且要做得好, 才有加人工的機會。個天係唔會跌D錢落黎比你！ 初入呢行, 的確須要多一點時間去適應, 係呢個適應期, D野未上手, 係會唔慣, 呢個階段我都經歷過, 我都可以捱得過, 點解你甘快就想放棄呀？ 究竟是什麼原因, 令你這樣頹廢呀~! 你要振作呀~~

收經~~~~

March 07,2006 昨晚臨收工, 阿姐叫左阿kid入去, 我以為老闆同阿kid照肺, 個心有點驚, 之後阿kid出返來原來只係叫阿kid的e-mail updated返。甘都冇甘驚~ 阿kid見我甘驚, 就不斷叫我 "收驚, 收驚....!!" 我聽聽下, 覺得唔對勁~~"我唔收得住嫁~~~!!" 其實佢係想叫我唔駛驚, 但情急之下就講左"收驚", 我地當堂笑到停唔到~~~~哈~~~哈~~~ 剛才, 阿文突然打電話同我講 "老闆叫我回家.", 我心想, 唔係呀麻, 比人炒呀? 原來佢老闆叫阿文回家拎回鄉證, 佢要跟同事返大陸的廠度打個招乎, 見個面。真係嚇得我呀~ 仲有今日又是GOOD DAY呀~(因為我今天也有把留海夾起)~

星期一, 工作狂, 好充實

March 06,2006 唔經唔覺已經6:34分, 今天過得真快, 主要原因係好多野做！所以時間都好似唔夠用甘！而家都應該放慢拍子, 等陣同間廠夾完野就走啦~我要返去煮飯比明天帶的！(呢間廠個人又係既, 6點15先黎到...早d黎物唔駛甘緊張lor.) 今天都過得唔錯, 起碼我阿哥的心情唔錯, 唔會煩到我, 仲好主動甘幫我出mail比客~ 我覺得係因為我把額前的留海夾起, 我的額頭成功甘照住自己~所以都有d運仔！(呢個講法係得到實驗證明, 每當我夾起留海的那天一定是GOOD DAY, 沒有夾起的那天心情都一定係BAD的....) 呢個吳偉文, 日日都走去踢波, 今晚去踢, 明晚又話去踢. 駛唔駛踢得甘密呀~你話甘樣點唔令我懷疑足球對於阿文來說比我更重要呢？他乾脆跟足球結婚好了！

星期日--打掃日~

March 05,2006 現在比起剛搬入來的時候, 真係懶左好多啦~以前每天都吸塵, 拖地..但現在盡量都想留待星期日先做。幸好, 兩個人住都唔會太污糟。 今晚想煮飯兼煲老火湯, 但唔知煲咩好, 可能最後都會係煲我最拿手的青紅蘿蔔蜜棗豬展湯--(因為真的是最簡單而又好味的湯水) 青 蘿 蔔 － 蘿 蔔 的 一 種 ， 能 清 熱 ， 有 健 胃 化 痰 ， 滋 潤 助 消 化 的 功 效 。 紅 蘿 蔔 － 含 維 他 命 A 、 B 1 、 B 2 和 C ， 更 含 大 量 胡 蘿 蔔 素 ， 能 補 血 強 身 ， 滋 潤 解 燥 ， 驅 胸 鬱 悶 ， 調 整 腸 胃 ， 降 火 氣 。 蜜 棗 － 潤 肺 止 咳 南 北 杏 － 可 止 咳 下 氣 ， 潤 燥 消 積 。 蒸條靚魚 蝦糕蒸豆腐 再加一個西蘭花炒雞柳 掂哂~~~一於甘話~~

今天會去揀衫影婚紗相, 好緊張呢！

March 04,2006 今早要返工, 但心情仍然是興奮不已的！因為今天下午四點, 我就要去為下星期六影婚紗相揀衫。唔知會點既呢？好緊張呀！ 昨晚我都再試穿GIRDLE, 都仲口岩穿WOR~驚喜~一直以為再穿不下的。

阿甘正傳

March 03,2006 早前明珠台做阿甘正傳，我已經好想看, 但那天有事要外出, 無法欣賞全套影片, 覺得有點遺憾, 所以昨天就想起, 要去買隻VCD睇先得！ 真的超值呢！只是20元就可以欣賞到這套榮獲1995年第67屆奧斯卡最隹影片, 最隹男主角, 最隹導演, 最隹劇本改編, 最隹剪輯, 最隹視覺效果六項大獎. 我是遲了那麼多年才看這套影片，但我都覺得好好看啊！並不是我想像中沉悶難明的故事，反而是輕鬆風趣的感覺。好似打乒乓球, 就好好笑！同埋真係好勁！ 其實, 我都好想可以做到好似阿甘一樣, 做事隨心所欲。不須理會外界的目光, 壓力。想法盡量簡單, 自由自在的生活~~~

睇黎阿汶都做得幾好呀~

March 02,2006 阿文昨天第一日返工，6點左右就比佢走啦。回來時, 就告訴我佢今天學左什麼東東, 例如1 GRS鈕, 即係有144粒，買配料要加損耗等等....好似都好充實甘。而且佢話在公司的時間都過得好快，D同事都幾好人甘。 佢公司只有6個人, 已包括佢, 其中兩個係老闆, 但好似話成日都不在公司的。其餘有兩個成熟的女人, 一個成熟的男人, 這個男人已RESIGN左, 所以只會帶住阿文到今個月廿號左右。阿文就要趁這段期間PICK UP哂成熟男人的工作。睇黎佢公司真的有將阿文作為一個初學者甘去教, 甘我都放心D。 最重要的是, 他的公司有微波爐呀~真好！ 甘我就可以整愛心飯盒比佢帶哪

好開心~阿文今天開始成為A.M.

March 01,2006 昨晚阿文見工掂左, 仲叫佢今日返工！我真係好開心呀！阿文終於有一份穩定的工了！ 終於唔係靠勞力而係靠腦力的哪~~~ 今天絕對係一個好有紀念價值的日子！在此我要特別鳴謝BARRY~欠你一餐飯！ 我現在最擔心的事情： - 阿文的公司有冇微波爐呢? - 阿文在公司用唔用到MSN的呢? 我今早到而家都打過電話比佢, 因為我驚會阻住佢做野. 所以一直忍住唔打比佢, 只有默默期待佢打來。已經好久好久未試過這麼期待他的來電了！比我自己第一天上班還要緊張呢！