烏龜沙青年日營

14/12/2014 ( 星期日) 晴天

今日是參加了明愛親子日營的日子，原本是早上9點要到明愛集合的。

但唔知咩事，郁媽搞左既閙鐘竟然失靈..

最後是大郁走過來叫醒我 :媽咪，你昨晚話我地要8點起身嫁，而家過哂8點啦！

我望望電話，竟然是8:56了！

原本諗住放棄的了，但大郁好唔開心，所以我試著打電話去明愛問最遲可幾點趕到。

最後姑娘話最多只能等到9:10

於是郁家發揮小宇宙，在10分內完成哂梳洗及出門口。

最搞笑既係大郁係呢個時候好認真甘問左郁爸一句:

甘媽咪要化妝點算呀！?

我在廁所聽到，比佢激死之餘，回應他: 媽咪今日唔會化妝啦！

9:14 趕到明愛，以為大家都走左，幸好，原來大家還未出發!

好野! 竟然趕到!!

今日我地係去烏溪沙青年營，有社工哥哥好搞笑的說他小時候叫呢度做“烏龜沙”, 大細郁也跟著這麼叫了!

今早甘趕，入到營，當然先搵個小食部食個早餐先啦！

跟住就去左康樂室玩康樂棋

等夠鐘，就去玩左大細郁期待以久的射箭啦！

我讚細郁好叻呀！射到草地呀！

細郁話: 唔係要射草地呀！要射個靶嫁!

估唔到細郁心水甘清既... 哈

跟住有個兒童版攀石，細郁攀到距離地面10 cm已經話好驚哪wo.....

大郁果然是馬騮仔，攀石對他來說完全無難道，攀多兩次之後，唔使一分鐘已經成功由一邊爬到另一邊了!

這裡的營社似乎不錯，感覺蠻新的。

最讚的是BBQ 爐在屋旁，很方便呢！

下次都可以試下book呢度宿營

早上環節最後的一小時，我們到大草地跟大顆一起踢波，因為太趕的關係，趕唔切同細郁著波鞋(對襪都係在車上穿的), 細郁行入龍門，就被個網絆住腳，鞋都甩埋，好搞笑!

青春係唔會等人的，跑吧！

細郁只是隻腳掂到個波，就開心到擺出港男6式影相。

跑完一輪之後，細郁累到個樣好搞笑!

大郁就仍然耳油未盡甘

踢完波，放飯啦！

$80/人，包玩，包車，包午餐，包遊戲，包禮物!

真是抵到爛啦！午餐有4餸一湯，白飯任添!

吃飽飯，下午的環節是親子遊戲!

每個家庭都要去到不同的點去完成任務。

總共有5個任務，第一個任務就是留係禮堂，用啤牌砌個金字塔，郁爸都用左頗長的時間才完成呢。

之後我地去兒童遊樂場既有親子二人三足，郁媽梗係醒啦，第一時間mark大郁同我二人三足!

郁爸就慘啦！同細郁行，細郁完全唔識協調，勁好笑!

完成後再去返營地入口，要一家人拖住手穿過一條大橡根繩，講求一家人的合作。

之後再去返飯堂門口跳大繩，我們要郁家四口一齊跳到8下，但好明顯細郁跳唔到，令我們NG左好多次，直頭有一刻覺得，有可能要跳到今晚天黑都未跳到8下wo....

最後，郁爸作出最大的犧牲，抱住19kg+的細郁跳大繩。

最後終於順利在天黑前完成跳大繩挑戰!

最後的一個環節，就是要郁家上下合力影一張sweet sweet 家庭寶麗萊照!!

完成哂5個項目，每個家庭有一份玩具禮物啦！

差不多4點就開始回程了！

今日郁家過了一個陽光開心的星期天~~

大郁的自制玩具

大郁學校的常識科，要求他們自己做一個玩具出來。

大郁二話不說，就話要整一部足球機。

星期六早上，諗住訓睲就教大郁畫球場的白線，點知一走出去，就見到大郁自己差不多畫好了!

真的好意外，大郁可以自己完成。

這部足球機雖然外表不算太令，但99%是大郁一手一腳包辦自制!!
可謂誠意十足嫁!!!

我就覺得好可愛啦！
D 足球員既樣係郁媽幫手畫既!
企係個盒頂那個是球證!!

媽咪從未買過甘大份玩具嫁~~

29/11/2014
趁大郁測驗完結，就帶他們倆去迪士尼玩玩啦！
其實都預左今日會超多人!
因為今天除了是星期六之外，而且迪士尼內的商品全部6折發售!
所以大家都買得好盡情!!
連一向揸緊隻宗旨，在迪士尼唔買玩具既郁媽都心軟下來....
每人比佢地買左一架飛機總動員既飛機玩具!!
真是唔買唔得嫁!!! 老年甘大隻，原價$198, 折左之後，$120都唔使呀！！

你睇佢地即買即拆黎玩，就知大細郁開心既程度有幾高啦！

大郁仲不斷周圍同人講:
媽咪從來未買過甘大份玩具比我地嫁!!
細細份既玩具媽咪就買過，甘大份既玩具，媽咪真的是從 來 未 買 過 比我地嫁~~~!!!

點解我好似覺得大郁講既說話好似有骨甘既.....

大郁收警告信

大郁的學校, 學生有小違規就會記一個三角形, 儲夠20個三角形就會有一個缺點.

另一方面, 三角形係可以用剔來抵銷.

升上二年級之後, 因為老師已不會好像一年級時甘包容, 所以大郁拎三角形真係易過食生菜.

記三角的原因通常都係下面這些: 

轉堂時不守秩序, 轉堂多言, 上課時沒有舉手便大聲說話, 上課玩文具, 經常不受控地發出聲音, 轉堂大叫, 塗污手冊及課本, 上課不專心, 大叫......

每次見到這些三角形, 我的心都會好痛, 同時我都會好嬲.

當我問大郁能否唔好再拎三角形返黎時, 佢竟調轉頭答我: 甘我拎返多D剔物得lo!

我同大郁解釋過點解老師要記你三角形, 主要因為你騷擾到其他人, 擾亂了課堂秩序, 甘樣你係唔口岩的.

大郁似懂非懂, 今日認哂錯, 但明天又有三角形.....

甚至有一個星期, 一至五裡面, 大郁有四天都有三角形拎返黎..

我真係嬲到不得了.

直言再拎三角形返黎就掉哂佢既玩具!!!

到下星期一, 大郁仍然拎了一個三角返黎(上課昤不專心, 玩間尺)

由於大郁很害怕我見到這個三角, 大郁自行在手冊上用原子筆刪去老師寫既字及三角, 以為甘樣, 我都會睇唔到.

結果當然唔會睇唔到啦, 而且仲犯埋校規(刪減手冊)

第二天我接大郁放學, 他的班主任特別叫我埋一邊傾呢件事.

話大郁甘樣做係一年好嚴重的事, 而且已經將呢件事交給訓導處理, 明天老師們會就此事開會, 決定怎樣處分大郁.

我同大郁班主任傾完後, 都擔心大郁對此事耿耿於懷, 於是我開解大郁.

大郁也對此事感到十分後悔, 知道唔應該甘做.

我說: 既然你係第一次犯錯, 而且有悔意, 媽咪今次就原諒你, 媽咪今次會同你一起去面對.

大郁問: 面對即係咩?

郁媽: 面對即係, 如果老師今次罰你, 罵你, 媽咪同你一起道歉及受罰.

但你都要做返乖WO, 陣間補習時要乖乖完成功課WO.

兩小時前好言相勸, 點知放補習時, 又是一樣, 又被老師話佢掛住玩水樽, 唔做功課.....

我真係嘔血嘔左一首"滿江紅"出黎...

終於到左判決的星期一, 放學時間要跟訓導老師見面, 老師都問大郁係咪細仔, 

因為大郁仲有好多一年班學乎會犯既錯誤.

我都將大郁既情況一五一十講哂比老師知, 傾了近一小時, 老師話今次係出一封警告信比大郁.

而且, 一定要比大郁知道, 整個小學生涯只有一次機會, 如果之前仲有犯校規, 就一定係處分, 而唔係一封信的了.

我立即舒了一口氣, 但是我亦知道, 下次無甘好彩的了.....

醫生最終開了藥比大郁...食定唔食好!!???

今日中午12:30就去接大郁，因為下午2點要去聯合醫院兒童精神科就大郁專注力不足方面覆診。

在等待的期間，大郁自己拎張畫紙出來畫畫，近期他喜愛畫A22號巴士 (因為我們是坐此巴士去迪士尼的)

等了差不多一個小時，才入去見醫生。
我把早前托大郁一年級時的班主任就大郁在學校行為而填寫的問卷交給了醫生。

醫生亦問到這半年大郁的進展如何。
我很坦白的跟醫生說，大郁學習方面算是習慣了。
首先我們不是要求他非要考到前十名那種。
我認為大郁用了不多的時間去溫習，已取得合格的分數，其實我已感到安慰。(再者，我亦明白要大郁再抽出更多的時間去溫習是十分困難的事)

但是，大郁在行為方面的確令我十分苦惱。
一星期五日，其中四日都可以拎到三角形回來! (儲夠20個三角形，就記一個缺點)

唔係轉堂時不守秩序，就是在課堂高聲大叫....
有時候更是雙料，三角形+欠交功課

如果繼續這樣下去，食藥是否唯一的辦法?

郁家 VS 熊貓 1600

1600隻熊貓訪港, 每天在fb都見到他們的相片, 真的很可愛呢~

所以今天郁家上下就舉家一起冒著熱死的去探熊貓啦~~

大細郁一見到甘多隻熊貓, 都已經忘記左自己大汗疊細汗了, 只有興奮的跟熊貓揮手, 拍照.

大郁擺post讓細郁拍照, 細郁好似只影到大郁個肚腩甘.

大郁繼續有耐性地讓細郁拍照, 但今次細郁只影到自己隻手指 (細郁的手指摭住左個鏡頭)

到細郁擺post影相啦

叉起腰又幾形呀, 哈哈~

行得好辛苦先黎到呢度嫁, 郁媽都要影返幾張先~

估唔到平時最憎去多人地方既郁爸, 雖然遇上甘熱既天氣, 仍然無黑面, 仲好開心甘一起自拍Wo, 熊貓的威力真是強大呢~~

郁爸仲要好偉大甘, 代替我們先去排 "抱抱熊貓"個條隊, 讓我們在這裡透透氣, 飲杯野..

呢杯可樂要$50元, 是我飲過最貴既可樂....但甘熱...$50都要飲, 仲要飲兩杯, 大細郁各一杯

去到"抱抱熊貓"區, 每節有1分鐘時間比大家抱起熊貓影相的, 大細郁當然超級開心~~而我和郁爸, 則好忙甘在這一分鐘裡影多D相片

細郁話熊貓真是好可愛呀!

因為時間很趕, 唯有係甘影, 都黎唔切叫大細郁埋位.

而家就埋到位啦.

抱起兩隻熊貓都無問題呀~

其實我好怕佢地抱唔實跌落地下跌爛D熊貓..好彩最後都無事~

細郁4歲生日快樂!

昨天是細郁的生日，自此，細郁就4歲了。

其實細郁一點都唔細，更屬於大隻仔黎。

他更可以一口氣就飲哂一包大麥精 （郁媽自己都做唔到，所以都覺得細郁真是好利害）

而學校由去年開始，讓小孩子於生日當天，穿著便服回校，老師校長一見到細郁穿便服，便跟細郁說“生日快樂!!”, 使細郁以為全世界都記得佢今日生日，開心到不得了！

以往都會為大細郁搞家庭生日會，但今年就只邀請了細郁好朋友YY一家及最可愛既豆豆妹妹。

一切從簡，最緊要開心。

有蛋糕就實開心啦～

4個小孩子，玩到不亦樂乎! 

幼兒組分開一枱食飯

最開心的切蛋糕時間啦

細郁最愛的芒果脆脆蛋糕

細郁的好朋友-YY

細郁話甘快就已經4歲了! 真是好懷念他還是BB的時期，真是好懷念他從我肚子彈出那一刻，姑娘將他放在我的心口，成隻老鼠仔甘細隻, 但而家!? 

如果讓細郁再坐係我的心口度, 我諗我會透不過氣來呢.......

細郁, 爸爸媽媽都祝你生日快樂! 身體健康, 繼續keep住肥厚的身型啊~~攬住你好有安全感的~!!

沒有姐姐的日子

沒有工人姐姐的日子，還剩下11天。
很感恩我的工作可讓我放假個幾月! （感覺好似放緊第三次產假甘 (>_<)）

我發現，照顧兩個甘活躍既小孩真的令你忙到連食野既時間都無（因為一有時間，我又想check下公司email,跟進一下客人claim的進度）

有時迫不得已，要返公司交返d文件，萬般無奈要帶埋大細郁返去，佢地當公司是遊樂場，興奮到無法細聲講野，又周圍走...騷擾到其他同事，真是令我好唔好意思。

唯一可提供暫托服務給我的郁婆婆又入左醫院做檢查。

令到我陷入十分困苦的環境之中。

但是，大細郁是我的兒子，我照顧他們，是必然的事呀！他們永遠放在我的第一位! 我轉工是為他們，我努力工作也是為他們呀! （我唯有不斷這樣提醒自己）

俗語說得好，有“危”便有“機”

經過今次沒有姐姐的日子，很多家務由大郁幫忙，如煮公仔麵，抹碗，抹地，拎衫去洗衣機洗，晾衫，摺衫....

甚至逢星期三及四，要去屋企附近的地方上暑期興趣班 ，大郁也能自己獨自前往，獨自回家，不用我帶著細郁管接管送!

我想，這次的試煉不是給我的，而是給大郁的。

大郁的確長大了!!

母校45週年聚餐

今天是郁媽曾就讀的中學 “伯裘英文書院”45週年的聚餐，今次是在尖沙咀 The One 煌府舉行。

記得上一次是40週年聚餐，我都有去呀！

因為其中一個舊同學臨時黎唔到，所以叫了大郁來替代。

今晚一次過見回很多老師及舊同學，中學時的回憶不斷在腦海中重播。

入讀伯裘，是很有緣份的，因為當時的郁媽，預備升中二，剛跟家人由上水搬家到官塘，正周圍搵學校，但因為郁媽中一時，是讀職業先修中學的，所以所有新官塘的文科中學都不肯收郁媽。

很快就要開學了，但仍然無學校收郁媽，如果再搵唔到學校，郁媽就要每天由官塘返粉嶺返學的了 (>﹏<)

因緣際會，好像是官塘區教育局的職員告訴郁婆婆，叫我們試位於美孚的伯裘英文書院，這裡會有學位!

於是，郁婆婆就帶著郁媽到美孚報名入讀。

我好記得當時面試的老師是Miss Lee, 她見完我之後，其實是想我重讀中一的，因為我畢竟之前是讀職業先修中學，那些中史，西史，地理是完全未接觸過的。

唔知點解，那時候的我都幾醒~主動請求Miss Lee讓我直接入讀中二，結果Miss Lee又真是比我唔使repeat, 直接讀中二(￣∇￣)

幸好，我都不負所望，我的成績沒有因為我中一未讀過那些科目而拉低~

直到中四，中五，郁媽自知自己對數學無興趣，所以選了全文科，因此要放棄選修我最愛的美術科。

郁媽點會甘易放棄呀！

我就以自修生身份報美術科的會考。

結果我的美術科拎到C呢~~Hehe~~

甘我就夠分原校升讀中六中七

之後就係超級恐怖的高考

最開心及最恐怖的日子都是在這裡渡過。

怎麼會忘記呢(>﹏<)

當年的訓導主任及數學科老師 羅Sir 

時常很語重心長，教英文及經濟的江Sir

當年充滿幹勁的文學老師 勁Sir

一衆舊同學跟中六班主任Miss Ma （大家未必知道那位是老師，因為老師們都好像吃了仙丹一樣，跟以前沒多大變化，反之，我們就大多變哂C9  (╯з╰)）

大郁陪我出席，其實對佢黎講都幾悶嫁， 但都能坐定，算係幾比面的了

大抽獎比大郁抽到百佳現金劵$50 (￣∇￣)

這是一個超級開心的晚上! 

以前年少時總不明白大人常常說“當你出來工作之後，就會寧願返去讀書”

現在真的完全同意這句說話，讀書時候的簡單是

最開心的~~

期待母校未來的50，55，60週年~~~